Simptomat që shoqërojnë fazën e parë të dashurisë

Simptomat që shoqërojnë fazën e parë të dashurisë

Dëgjojmë shpesh fjalën dashuri. Të gjithë i lidh ndjenja, pasioni, tërheqja me dikë tjetër. Por me cilën pjesë të trupit dashurojmë? Femra dhe meshkuj, çifte të reja dhe të vjetra përdorin zona të ndryshme të trurit për të dashuruar. Një studim tregon se cilat janë këto zona të cilët krijojnë këtë pështjellim ndjenjash të quajtura “dashuria”. Është e sigurt dhe e ditur nga të gjithë që “Dashuria të ndryshon” si në aspektin fizik ashtu edhe në atë emocional. Kjo është një shprehje shumë e vjetër, e cila ka rezultuar e vërtetë. Qesh më shumë, bëhesh më i mirë dhe nuk përqendrohesh.

Trupi dhe dashuria

Falë metodave moderne të studimit të trurit, si p.sh., rezonanca manjetike, është e mundur që të ekzaminojmë proceset neurobiologjike, të cilat janë të lidhura me emocionet dhe ndjenjat. Një publikim i ri i Shoqërisë së Neuro-Shkencëtarëve ka verifikuar se cilat janë zonat në tru, të cilat aktivizohen kur ndizet shkëndija e dashurisë. Rezonanca manjetike është eksperimentuar te 17 femra dhe meshkuj të dashuruar teksa tregonin gjendjen e tyre të dashurisë, si dhe te njerëzit, të cilët nuk kishin rënë në dashuri. Aktiviteti cerebral i personave, të cilët kishin rënë në dashuri korrespondonte me një përfshirje më të madhe emotive te zona cerebrale e djathtë. Këto zona të trurit janë të pasura me dopaminë që lëshojnë energji, dëshirë kundrejt stimujve të reja, motivim dhe ekzaltim. Të gjitha këto simptoma shoqërojnë fazën e parë të rënies në dashuri.

Të biesh në dashuri

Është e rëndësishme që të theksohet se ndërmjet pasionit fillestar dhe atij të mëvonshëm vihen në punë zona të veçanta të trurit, të cilat janë të lidhura me impulset dhe ndjenjat që ndiejmë kur jemi në një lidhje të stabilizuar prej kohësh. Të dhëna, të cilat konfirmojnë edhe nga ana neurobiologjike ndjenjën e dashurisë që rritet me kalimin e kohës. Mënyra e të reaguarit për të njëjtën ndjenjë është edhe nga ana cerebrale e ndryshme. Në trurin e një femre të dashuruar aktivizohen më së tepërmi zonat të cilat janë të lidhura me emocionet, përkujdesjen, dëshirën dhe përkushtimin e madh. Ndërsa pjesa më e madhe e meshkujve, shpjegojnë përgjegjësit e eksperimentit, kur bien në dashuri kanë më të aktivizuar zonat të cilat janë të lidhura me eksitimin seksual. Për të vetmuarit studiuesit këshillojnë konsumimin e çokollatës, sepse kjo e fundit stimulon zonat që përmendëm më lart.

Nxitësit emocionalë

Stimuli emocional është i motivuar dhe i udhëhequr nga nevoja për kënaqësi dhe dashuri. Ai ushqehet nga fantazia dhe imagjinata erotike. Në këtë përmasë intime dhe emocionale futet si raporti që personi ka me veten, ashtu edhe marrëdhënia që ndërton me të tjerët. Vetëvlerësimi, besimi në vete dhe në aftësitë personale, të pëlqyerit dhe një imazh i mirë trupor janë mbështetës të mrekullueshëm të dëshirës. Janë disa arsyet që të shtyjnë në sjellje seksuale: ankth, trishtim, ndjenjë vetmie, afeksion, nevojë për intimitet emocional, nevojë për të shkarkuar tensionin ose për të pasur avantazhe.

Përkujdesja dhe intimiteti

Në jetën në çift është tepër e rëndësishme të krijosh një raport të mirë jo vetëm seksual, por edhe shpirtëror. Prandaj atmosfera në çift duhet të krijohet e ngrohtë dhe sensuale. Është e rëndësishme që të realizosh një mënyrë të veçantë të prekuri, që asaj t’i pëlqejë dhe ta bëjë të ndihet mirë. Por këto lëvizje nuk duhet të përsëriten shpesh mekanikisht sepse bëhen monotone. Dhe këto ndjesi një femre i duhen falur, jo vetëm gjatë një raporti, por edhe në momente të ndryshme, në mënyrë që ajo të ndjehet vazhdimisht e dëshiruar nga partneri. Një puthje e lehtë, një fjalë e ngrohtë, përkujdesja në momentin e duhur, vlejnë për të krijuar një atmosferë të përshtatshme shpirtërore të femrës gjate marrëdhënies. Prandaj partneri më i mirë është ai që gjithmonë vëzhgon, kërkon, eksploron teknika, pika të ndjeshme të partneres së tij, për të vepruar me to edhe në situatat e nxehta të jetës në çift.

Ndjenja dhe variacioni

Asgjë nuk mund të ndalojë pasionin e dy njerëzve të dashuruar. Në këtë rast nuk ka rëndësi se ku ndodhesh, sa vjeç je, je i lodhur apo jo fizikisht, je rehat në krevat apo ku ndodhesh. Afrodisiaku i vërtetë dhe i pagabueshëm është dashuria, i pastaj qëndron variacioni. Variacioni rinovon zjarrin e dashurisë. Kjo shpjegon poligaminë si dhe mungesën e besnikërisë. Por për të ndezur dëshirën në një çift ku ekziston dashuria ka vend edhe imagjinata. Një gjë e tillë mund të ndiqet edhe gjatë gatimit. Çdo gjë që gatuhet për një të dashur është sensuale, por është akoma më shumë në se të dy marrin pjesë në gatim, duke shfrytëzuar rastin që së bashku me qërimin e lëkurës së qepës, të fillojnë të zhvishen edhe ata. Kontrasti dhe surpriza janë erotike, një vajzë e veshur me pantallona të shkurtra dhe e hipur në një motoçikletë mund të duket eksituese, ndërkohë që një burrë në një situatë të tillë mund të duket qesharak.

Shtatzënia dhe infeksionet

Kur jeni të përgatitur, keni më shumë mundësi për të zgjedhur, më shumë liri dhe kënaqësi. Në qoftë se dëshironi të jeni aktivë nga ana seksuale, marrëdhëniet seksuale duhet t’i shihni si kënaqësi, por njëkohësisht atyre duhet t’u kushtoni vëmendje serioze. Nëse doni që të shmangni shtatzëninë dhe infeksionet që transmetohen në rrugë seksuale, duhet të përdorni metodat mbrojtëse kontraceptive. Mund të jeni në dijeni të një liste mjetesh kontraceptive që mund t’i përdorni për të shmangur shtatzëninë. Disa prej tyre sigurojnë mbrojtje edhe nga infeksionet që transmetohen në rrugë seksuale. Nëse keni pyetje, shqetësime ose vështirësi rreth mjeteve kontraceptive, konsultohuni me specialistë në Shoqatën e Planifikimit Familjar ose me mjekun. Mjete kontraceptive për femrat janë ato që merren nga goja, si: pilula ose tableta që përmbajnë hormone të cilat e ndalojnë procesin e lëshimit të vezëve nga vezoret çdo muaj.

Marre nga: Tirana Observer