Si ndikon puna në shëndetin tonë?!

SI NDIKON PUNA NË SHËNDETIN TONË?

Mënyra e jetesës, pra edhe puna, në të cilën kalojmë
pjesën më të madhe të ditës, ndikon në shëndetin
tonë. Dhimbje kurrizi apo sysh, lodhje, probleme me
tretjen dhe frymëmarrjen, alergji, stres, etj, janë
disa nga problemet që mund të shkaktohen nga puna.
Përveç kësaj, puna ulur ndikon edhe në cilësinë e
jetës sonë të përditshme dhe nëse këto probleme
nuk trajtohen, çojnë nësëmundje më të rënda...

1. EKRANET E KOMPJUTERIT

Është normale që, pas një dite pune, sytë të na djegin,
të na lotojnë, apo të skuqen, bile në rastin më të keq,
të na dhembë edhe koka. Është vërtetuar se, nëse kalon
më shumë se 20 orë në javë para një ekrani kompjuteri
provokohet lodhja e syrit dhe pas disa vitesh pune,
sëmundjet kronike të syrit rëndohen.

- Si mund të ndalohet?

Sipas rregullave, ekrani i kompjuterit duhet të jetë i pajisur
me filtra mbrojtës dhe të vendoset përballë punonjësit, në
lartësinë e syve të tij dhe as përballë as me shpinë nga
dritarja, për të evituar reflekse të dëmshme.
Pastaj është mirë të bëhen pauza të paktën çdo orë (më
mirë çdo 30 minuta), për të çlodhur shikimin.
Më mirë është të vështrosh larg nëpërmjet dritares, pa u
fiksuar në asnjë objekt konkret. Gjithashtu është mirë të
evitohen ndryshimet e fokusimit të ekranit.
Çdo dy orë mbyllni sytë , vini duart mbi to, pa ushtruar
presion dhe lëvizni kokërdhokun e syrit sa majtas, djathtas.
Mundohuni të kontrolloni sytë një herë në vit tek oftamologu.

2. DHIMBJET E KURRIZIT

Një karrige e papërshtatshme, qëndrimi i keq apo i gjatë në
pozicionin ulur, gjestet e përsëritura dhe vendosja jokorrekte
e materialit të punës përpara janë shkaktarët kryesorë të
dhimbjeve të tilla. Këto zakone të këqija mund të shkaktojnë
kontraksione, lumbagji, spondiliartrozë e deri hernie diskale.

- Si mund të parandalohen?

Fillo me uljen në një karrige të mirë, të qëndrueshme, me
rrota që nuk rrëshqasin dhe që evitojnë zhvendosjet e papritura,
me ndenjëse që mund të rregullohet në mënyrë që këmbët të
mbështeten mirë në tokë (këmbët duhet të qëndrojnë në kënd
të drejrë), me një shpinore fleksibël dhe të rregullueshme që
t'i përshtatet kurrizit tënd.
Duhet të uleni sa me drejt të jetë e mundur, duke u munduar
të mos kryqëzoni ose varni këmbët , për të evituar problemet
me qarkullimin. Ngrihuni çdo orë dhe shëtisni nga pak, bile
mund të çlodhni këmbët edhe duke i vënë në një stol, apo
karrige tjetër. Dy herë në ditë bëj ushtrime: Shtrij kurrizin,
ktheje kokën prapa-para 10 herë dhe 5 herë nga të dyja anët.
Uli dhe ngriji supet 15 herë, bashkoi duart pas dhe shtrini
shpatullat dhe krahët. Ki kujdes kur të flasësh me telefon,
sepse 30% e dhimbjeve dhe tensioneve të qafës shkaktohen
nga keqpërdorimi i tij, për shembul kur shtrembëron qafën
për ta mbajtur telefonin pa duar. Evito kthimet e papritura
për të kapur receptorin kur bie telefoni ose për të kapur dosjet,
letrat, etj, dhe lëviz duke rrotulluar gjithë trupin, edhe këmbët,
jo vetëm belin. Nëse të duhet të ngresh arka ose material të
rëndë, kurrë mos u përkuk me këmbët e drejta, as mos o ngri
papritmas, ulu duke përthyer kyçin e këmbës, kape peshëm me
të dyja duart dhe ngrije ngadalë, me gjithë trupin. Për ta
zhvendosur nga një vend në tjetrin vendose në lartësinë e
gjoksit dhe në këtë mënyrë pesha nuk do të bjerë vetëm në
njërën anë të trupin (aplikoje këtë gjë edhe kur mban çanta
e valoxhe shumë të mëdha). Jashtë pune, forcoje kurrizin dhe
bëje atë më elastik me ushtrime, me ushqime që përmbajnë
kalçium dhe duke evituar kilet e tepërta.

3. NJË AMBIENT I KEQ


Kushtet e paëpështatshme të punës në shumë zyra, sidomos
sistemi i tyre i ventilimit dhe i ajrit të kondicionuar, janë
përgjegjëse që temperatura dhe ajri që thithim të na shkaktojë
alergji, dhimbje dhe rëndesë koke, probleme të lëkurës, irritim
të syve e fytit dhe probleme me frymëmarrjen.


- Zgjidhja?

Nuk është shumë e thjeshtë, sepse nuk e kemi në dorë të
ndryshojmë zyrë. Idealja do të ishte t'i ventilonim herë pas
here, por nëse dritaret nuk hapen, bëj një shëtitje pas buke
dhe detyro ndërmarrjen që të rregulloje kushtet e ventilimit.

4. NJË NDRYSHIM I BEFTË I TEMPERATURËS

Ky është një tjetër problem. Shumë ngrohtësi në dimër dhe
shumë ftohtë në verë, në kontrast me temperaturën jashtë,
bëjnë që kur dalim në rrugë të vuajmë nga një "shoook " i
vogël termik që na ul tensionin, shkakton marrje mendsh dhe
dobëson mbrojtjen e organizmit duke na bërë të sëmuremi
më shpesh nga gripi dhe rrufa (edhe në ditë të nxehta).


- Si zgjidhet?

Para se të dalësh qëndro pak minuta tek dera e hyrjes me
qëllim që trupi të mësohet e mësohet dalëngadalë me
temperaturën e re.

5. MUNGESA E LAGËSHTIRËS

Është një faktor tjetër që ndikon në shëndetin tonë. Kur
ambienti është më i thatë sesa rekomandohet (lagështira
relative duhet të jetë 40-70%) shkakton irritim tek sytë,
çhidratim të lëkurës dhe tharje të mukozave të sistemit
të frymëmarrjes.

- Si evitohet?

Mund të vendosen lagështues të vegjël të ajrit që punojnë
me elektricitet në vende të ndryshme të dhomës dhe të
mbahen lule në dhomë. Duhet pirë më shumë ujë, përdor
një spraj për të lagur lëkurën herë pas here dhe duhen
përdorur produkte të mira hidratuese.

6. STRESI

Ai nuk sulmon vetëm drejtuesin e lartë, por edhe të tjerët,
përfshi këtu edhe ata që bëjnë punë monotone. Mungesa
e motivimit në punë, presionohet, nxitimi, bashkjetesa me
kolegët dhe shefat mund stresojnë shumë. Në fund stresin
e paguan organizmi me pagjumësi, dhimbje koke, dhimbje
të ndyshme, takikardi, tretje jo të mirë, ulçëra, irritim,
ndjesi stërlodhjeje, vështirësi në përqëndrim, depresion
dhe rëndim të problemeve të veçanta të secilit.


- Si zgjidhet?

Mund të ndihmojë ndonjë teknikë relaksimi, praktikimi i një
hobi... Por, nëse e ndjen se nuk i bën dot ballë stresit, kërko
ndihmën e një specialisti.

7. NJË DITE PUNE NË KËMBË

Ka vende pune dhe profesione në të cilat je i detyruar të rrish
gjithë ditën në këmbë, gati pa mundur të ulesh.
Kaq orë qëndrimi në këmbë mund të shkaktojë probleme si:

-Rëndesë dhe fryerje të kyçeve të këmbëve.
Për t'u mbrojtur nga ky problem, evito çorapet e ngushta dhe
këpucët me taka të larta, që shtrëngojnë. Mund të përdorësh
çorape speciale për çlodhjen ndërkohë që punon.
Çdo orë shko në banjo dhe ulu disa minuta. Kur të shkosh në
shtëpi beju masazh këmbëve me kokën e dushit me ujë të
ftohtë dhe apliko më pas një krem që lehtëson qarkullimin e
gjakut tek këmbët (shitet në farmaci). Kur të shtrihesh ngreji
këmbët lart, lëvizi sikurse të jesh duke ngarë biçikletën dhe
vër një jastëk poshtë këmbëve kur të flesh.

-Variçet.
Ky problem është i pranishëm në trupin tënd kur tek këmbët
fillojnë të duken venat e vogla të kuqe, që mund të dalin që
nga mosha 25 vjeçare. Nëse punon në këmbë dhe ke njerëz
të familjes që kanë vuajtur nga variçet, nëse ke mestruacione
të çrregullta dhe je në mbipeshë duhet të shtosh vigjilencën.
Sapo të kesh mundësi, çlodhu me këmbët lart dhe kujdesu
për këmbët siç këshillohet më lart. Nëse varçet rëndohen,
konsultohu me mjekun për trajtime të tilla si: Elektroliza
apo kirurgjia. Në këto muaj bëj kujdes me diellin: Mos bëj
banjo dielli tek këmbët dhe përfito nga vera për të notuar,
për të bërë shëtitje në plazh dhe masazhe të forta me peshqir.

8. NËSE PUNON ME PRODUKTE IRRITUESE PSE TË RREZKSHME

Në disa punë si parukeri, laboratore, ndërmarrje pastrimi,
ngjyrosjeje, etj mund të punohet me produkte që irritojnë,
shkaktojnë djegie ose edhe plagë të vogla.
Mënyra për ti evituar këto shqetësime është të përdoren
doreza dhe kur ndodhin të jepet shpejt ndihma e parë


-Puçrra të vogla:
Kalo mbi lëkurë një pambuk me ujë ftohtë dhe konsultohu me
farmacistin që mund të japë një krem qetësues. Nëse të djeg
apo të kruhet, mos e bëj këtë me thonj, por me mollëzat e
gishtave të pastra. Duhet parë se cili produkt e shkakton dhe
për këtë duhet ti drejtoheni dermatologut.

-Djegie:
Duhet ftohur vendi i djegur shpejt me ujë, duke e futur në një
enë. Mbaje brenda derisa dhimbja të pushojë dhe mos apliko
asnjë produkt. Nëse është djegie e lehtë, mjafton të zhysësh
dorën çdo gjysëm ore në ujë. Nëse është djegie e rëndë duhet
vajtur menjëherë në urgjencë.

-Plagë:
Nëse ato nuk nxjerrin shumë gjak, laje plagën me ujë të
oksigjenuar dhe vër një ankerplast ose fasho të pastër.
Nëse nxjerr shumë gjak, vulose vendin e plagës me një
shami ose peshqir të pastër dhe shtrëngoje fort, derisa
të pushojë hemoragjia.