13 TESTAMENTET MË TË FAMSHME TË PERSONALITETEVE BOTËRORE

13 TESTAMENTET MË TË FAMSHME TË PERSONALITETEVE BOTËRORE
　
1.
NIKOLLA KOPERNIK,
ASTRONOM POLAK
(1473 – 1543)

I njohur gjithë jetën më shumë si fizikan se sa si astronom, i la trashëgim një libër mjekësor mjekut të tij personal, Fabian Emmerich. Librat e tjerë të tij ai ia la trashëgim katedrales Frauenburg në Frombork, Poloni, ku shkencëtari kaloi disa vite si famulltar. Ato çka i mbetën nga pronat e tij, ai ia la motrës së martuar, ndërsa titulli i tij i kaloi djalit të një nipi sipas një marrëveshje të mëparshme.


2.
HARRI S. TRUMAN,
PRESIDENT AMERIKAN
(1884 – 1972)


3.
I përmendur i pari në testament, populli amerikan mori si trashëgimi nga presidenti i tij gjithë letrat dhe materialet historike të librarisë "Truman". Në testamentin 28-faqesh ai i la pronën me vlerë 610 mijë dollarë bashkëshortes dhe vajzës së tij. Të afërmit dhe bashkëpunëtorët e tij përfituan sipas testamentit nga 500 dollarë deri në një mijë dollarë. Përsa i përket varrit, ai kërkonte një pllakë të sheshtë dhe vetëm të dhënat kryesore të gdhendura në të.


4.
FRANC LIZT,
KOMPOZITOR HUNGAREZ
(1811-1886)

12 faqet e testamentit, të shkruara në vitin 1860, përbëheshin më shumë nga rrymë emocionale e devocionit të tij të betuar ndaj princeshës Sayn-Uitgenshtain. "...gjithashtu i kam borxh asaj gjithçka që kam, gjithçka unë jam dhe atë pak që kam...rreth 220 mijë franga". Ai e ngarkonte atë që ta ndante shumën "në pjesë të barabarta me dy vajzat e tij, Blandine dhe Cosima" dhe të vazhdonte "pas vdekjes sime marrëdhëniet e përzemërta me Vagnerin".


5.
MBRETËRESHA VIKTORIA E MBRETËRISË SË BASHKUAR
(1810-1901)

Pasi kaloi gjysmën e jetës duke vajtuar vdekjen e bashkëshortit të saj, princit Albert, ajo tha: "Po vdes në paqe, duke qenë e ndërgjegjshme për fajet e mia të shumta...dhe duke besuar ndershmërisht se do bashkohem me bashkëshortin tim të dashur, nënën time dhe fëmijët e mi...". Ajo ia la trashëgim dy rezidencat e saj private, Balmoral dhe Frogmore, djalit të saj Eduardit VII.


6.
HANS KRISTIAN
ANDERSEN,SHKRIMTAR
(1805-1875)

Shkrimtari beqar ia la pjesën më të madhe të pasurisë së tij, Edvard Kolin, këshilltarit ekonomik dhe mikut të tij. Gjithashtu, një pjesë e trashëgimisë së tij i kaloi dhe qytetit të lindjes së Andersenit, Odensës. Ai ia dha librat dhe dorëshkrimet e rralla, ku përfshiheshin dhe boca të punëve të Çarls Dikensit, Librarisë Mbretërore Daneze. Ai gjithashtu la trashëgim shumën e parave që do të duhej për botimin e letrave që ai kishte marrë gjithë jetën nga personazhe të njohura botërore.


7.
UDROU UILLSON,
PRESIDENT AMERIKAN
(1856 – 1924)

Uillson ia la gjithçka kishte së bashku me një pronë me vlerë 600 mijë dollarë gruas së tij, Edit. Nëse ajo vdiste "fëmija ose fëmijët e saj do të trashëgojnë pasurinë dhe do ta ndajnë me vajzat e mia...". Në testamentin e ish-presidentit amerikan gjithashtu theksohej se vajza e tij, Margaret duhej të merrte një të tretën e të ardhura nga pronat e tij "për sa kohë ajo është e pamartuar".


8.
VLADIMIR LENIN, POLITIKAN RUS
(1870 – 1924)

I diktuar në dhjetor të vitit 1922, kur ai e dinte se po vdiste, dokumenti i njohur si "Testamenti i Leninit", u orvat të korrigjonte prirjet totalitare të shtetit të ri komunist. Gjithashtu në testament ai shkruante: "Unë u propozoj shokëve të gjejnë një mënyrë për të shfuqizuar nga pozitat e tij Stalinin dhe të emërojnë dikë tjetër, ndryshe në të gjitha aspektet...dikë më tolerant, më besnik, më të sjellshëm dhe më pak kapriçoz".


9.
MARI KYRIE,
FIZIKANTE, KIMISTE
(1867 – 1934)

Një gramë radium i pastër, të cilin ajo e kishte marrë si dhuratë nga gratë e Amerikës, ishte e vetmja pronë e saj me vlerë. "Duke qenë se vlera e elementit është shumë e madhe për ta kthyer në një trashëgimi personale, dëshiroj t'ia lë gramin e radiumit Universitetit të Parisit, me kushtin që vajza ime, Irene Kyrie të ketë liri të plotë për të përdorur këtë gramë... sipas kushteve nën të cilat do të kryhen kërkimet e saj shkencore".


10.
FRANZ KAFKA,
SHKRIMTAR
(1883 – 1924)

Trashëgimia e tij letrare ishte i vetmi shqetësim i Kafkës. Në një shënim të gjetur në tryezën e tij, që i adresohej mikut Max Brod, shkruhej: "...të vetmit libra që mund të dhuroj disi janë "Gjykimi", "Metamorfoza", "Doktori i fshatit", "Kolonia penale".... Kjo nuk do të thotë se dua që ato...t'u kalojnë brezave të ardhshëm. Dua të zhduken... Çdo gjë tjetër e imja duhet të digjet, pa përjashtim". Por Brod nuk e plotësoi dëshirën e fundit të Kafkës.


11.
LEON TOLSTOI,
SHKRIMTAR RUS
(1828-1910)

Leon Tolstoit iu desh të shkruante pesë herë testamentin e tij pas kundërshtimeve të hidhura të bashkëshortes dhe djemve të tij. Testamentin final e plotësi vitin e vdekjes, 1910. Mosmarrëveshjet familjare kushtëzuan vendimin e tij për t'ia lënë gjithë shkrimet dhe të drejtat e botimit vajzës së tij të vogël, Sasha, e cila ishte instruktuar për t'i përdorur ato në të mirë "të njerëzve". Sasha i bleu më vonë nënës së saj pronën e familjes dhe ua dha tokën fshatarëve sipas dëshirës së babait.


12.
GUSTAV FLOBER,
SHKRIMTAR FRANCEZ
(1821-1880)

Pasi kishte sakrifikuar pjesën më të madhe të parave të tij për të mbështetur bizneset e bashkëshortit të mbesës së tij, një tregtar i ngathët lëndësh drusore, Flober mbeti vetëm me pronën e tij letrare, të drejta autori, dorëshkrime dhe letra. Këto ai ia la mbesës së tij të lartpërmendur. Ai ia la trashëgim tryezën mbi të cilën kishte shkruar romanet e tij mikeshës së tij platonike, madame Roger des Genettes.


13.
KAHLIL GIBRAN,
POET LIBANEZ
(1883 – 1931)

Privilegjet që vinin nga shtatë librat e tij, me të cilët kishte fituar pak sa ishte gjallë, Gibran ia la fshatit të tij të lindjes, Bsherri në Liban. Rritja e shitjeve çdo vit i solli fshatit të ardhura prej një milionë dollarësh për vit. Por deri në vitin 1967, kur qeveria libaneze mori në dorë menaxhimin e trashëgimisë, fshati u kthye në një ring ku luftohej më shumë për kontrollin e parave sesa për përdorimin e tyre në të mirë të komunitetit.